ካባኻ እሞ ናበይ !።
ምሳኻ ይሕሸኒ ኣብ ጽላልካ ኣጽሊለ
ኣይደልን ብፍጹም ካባኻ ክፍለ
ናበየ ክኸይድ ካባኻ ሪሒቀ
እንታይከ ኣሎ ካባኻ ዝጸበቀ
ኣይደልን ክነብር ካባኻ ርሒቀ
ምሳኻ ይሕሸኒ ዋላ ተጸቂጠ
ዋላ ይምረር ኩሉ ጎይታየ ምሳኻ
ኣይደልን ክርሕቅ በፍጹም ካባኻ
ህይወት ትርጉም የብሉን ኣቦየ ብዘይካኻ
ዋላ ይሕሰም ይጥዓም ይጻዕጽዕ ሽግር
ብዘይካኻ እሞ ጎይታ ከመይለ ክነብር
ምሳኽ ይሕሸኒ ንደሓር ክኻብር
ምስቶም ቅዱሳንካ ኣብ ሰማይ ክዝምር
ኣነስ ብዘይካኻ ባዶ ኢየ ዜሮ
ሓንቲ ቁጽሪ ዘይመልእ ኩሉ ዝሓጸሮ
ብዘይኻ ምንባር ከመይ ኢለ ክነብሮ
ንዓይሲ ከቢድ ኢዩ ገዚፍ ልዕሊ እእምሮ
ዋላ ነገር ስጋ እንተ መረረኒ
ነገራት ተገቲሩ እንተኸበደኒ
ካባኻስ ኣይፍለን ሞት ይሕሸኒ
ኣብ ልበይ ሰፊርካ ኢኻ ፍቅርኻ መሊኹኒ
ኣነ ኣይኮን ዝነብር ዘለኹ ንስኻ ኢኻ ኣባይ
ናትካ ደኣ እንበር ኣይኮንኩን ናይ ግለይ
ካብ ባሕሪ ዝወጸ ዓሳ ኢየ ኣነስ ብዘይካኻ ጎይታይ
ብኣኻን ኣባኻን ኢዩ ትምንባረይ
ካባኻ ተፈልየስ ኣይክኣልን ምንባረይ
ቀሺ ሙሴ ሽሻይ
No comments:
Post a Comment